(24 кастрычніка 2016) Дні культуры Беларусі ў В’етнаме плануецца правесці ў 2017 годзе. Размова аб гэтым ішла на сустрэчы Надзвычайнага і Паўнамоцнага Пасла Беларусі Уладзіміра Гошына з міністрам культуры, спорту і турызму В’етнама Нгуен Нгок Тхіенам, паведамілі БЕЛТА ў прэс-службе Міністэрства замежных спраў.
На сустрэчы абмяркоўваўся шырокі спектр пытанняў супрацоўніцтва ў галіне культуры, узаемнага ўдзелу ў спартыўна-масавых мерапрыемствах, якія праводзяцца на тэрыторыі дзвюх краін, а таксама па актывізацыі работы, накіраванай на павелічэнне турыстычных патокаў у абодвух напрамках. «Адбылося абмеркаванне арганізацыйных пытанняў па правядзенні ў 2017 годзе Дзён культуры Беларусі ў В’етнаме і ў 2018 годзе Дзён в’етнамскай культуры ў Беларусі, а таксама магчымасць арганізацыі ў 2017 годзе сумеснага ўрачыстага мерапрыемства, прымеркаванага да 25-годдзя з дня ўстанаўлення дыпламатычных адносін паміж Беларуссю і В’етнамам», — праінфармавалі ў прэс-службе.
В’етнамскаму боку перададзены спіс спартыўна-масавых мерапрыемстваў, правядзенне якіх запланавана на тэрыторыі Беларусі да канца 2016 года. Уладзімір Гошын таксама прапанаваў разгледзець магчымасць навучання в’етнамскіх грамадзян у Беларускім дзяржаўным універсітэце фізічнай культуры па падрыхтоўцы спартсменаў і трэнераў па алімпійскіх відах спорту.